Кибишов Адилхан Талгатовичнинг

фалсафа доктори (PhD) диссертацияси ҳимояси ҳақида эълон

I.Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Вакуумли фрактал қуёш сув иситиш коллектор қурилмасини ишлаб чиқиш”, 05.05.06 – “Қайта тикланадиган энергия турлари асосидаги энергия қурилмалари” ихтисослиги бўйича.
Диссертация мавзуси рўйхатга олинган рақам:
Илмий раҳбар: Авезова Нилуфар Раббанакуловна, техника фанлари доктори, катта илмий ходим.
Диссертация бажарилган муассасалар номи: Фарғона давлат техника университети ва Хўжа Аҳмад Яссавий номидаги Халқаро қозоқ-турк университети.
ИК фаолият кўрсатаётган муассаса номи, ИК рақами: Фарғона давлат техника университети, PhD.03/2025.27.12.T.19.01.
Расмий оппонентлар: Матчанов Нураддин Азадович, техника фанлари доктори, катта илмий ходим;
Вохидов Акмал Улашевич, техника фанлари бўйича фалсафа доктори (PhD).
Етакчи ташкилот: Ош техналогия университети (Қирғизистон Республикаси)
Диссертация йўналиши: назарий ва амалий аҳамиятга молик.
II. Тадқиқотнинг мақсади қуёш инсоляцияси паст ва атроф-муҳит ҳарорати манфий бўлган шароитларда ҳам барқарор иссиқлик унумдорлигини таъминлайдиган вакуумланган фрактал қуёш сув иситгичи коллектори геометриясини ҳисоблаш усуллари ва такомиллаштирилган конструкциясини ишлаб чиқиш.
III. Тадқиқотнинг илмий янгилиги:
ярусларнинг ўзаро сояланишини бартараф этиш ва нур ютувчи структуранинг масштаб инвариантлигини таъминлаш имконини берувчи, параболик апертурали вакуумланган бўшлиқда тороидал абсорберларни олтин кесим қонуни асосида иерархик жойлаштиришга асосланган вакуумли фрактал қуёш сув иситиш коллекторининг такомиллаштирилган конструкцияси ишлаб чиқилган;
биринчи тартибли аналитик узатиш функцияси ёрдамида ўткинчи жараёнларни ҳисоблаш имконини берувчи ҳамда қуйи частотали филтр хусусиятлари ҳисобига ўзгарувчан булутлилик шароитида иссиқлик унумдорлигининг барқарорлигини таъминловчи коллекторнинг динамик математик модели ишлаб чиқилган;
яруслараро радиацион алмашинувни ва эгри чизиқли каналлардаги иккиламчи оқимларни ҳисобга олган ҳолда радиацион-конвектив иссиқлик алмашинувини CFD-моделлаштиришга асосланган коллекторнинг энергетик характеристикаларини ҳисоблаш методикаси такомиллаштирилган;
бўшлиқни вакуумлаш ҳисобига иссиқлик йўқотишларини камайтириш ва ўртача вазнлантирилган иссиқлик ФИКини 66,0 % гача ошириш имконини берувчи, селектив қопламали энергия тежамкор вакуумланган фрактал қуёш сув иситиш коллектор қурилмаси ишлаб чиқилган.
IV. Тадқиқот натижалариниг жорий қилиниши. Иссиқ сув таъминоти тизимлари учун вакуумли фрактал қуёш сув иситиш коллектор қурилмасини ишлаб чиқиш бўйича олинган натижалар асосида:
фрактал абсорберлар билан жиҳозланган вакуумли фрактал қуёш сув иситгич коллектори конструкцияси ва иссиқлик унумдорлигининг барқарорлигини таъминловчи коллекторнинг динамик математик модели Тошкент давлат техника университетида таълим жараёнида ҳамда Ф-ОТ-2021-497-сонли фундаментал лойиҳасини бажаришда фойдаланилган (Ўзбекистон Республикаси Олий таълим, фан ва инновациялар вазирлиги Олий таълим ривожланишини тадқиқ этиш марказининг 2025-йил 23-сентабрдаги 02/01-01-365-сон маълумотномаси). Натижада, гибрид фотоелектр-иссиқлик қурилмасининг иссиқлик контурини моделлаштириш ва тажриба намунасини ишлаб чиқиш имконияти яратилган;
вакуумли фрактал қуёш сув иситиш коллектори (Қозоғистон Республикасининг 2023-йил 30-июндаги №36213-сон ихтиро патенти) Қозоғистон Республикаси «Кентау трансформатор заводи» АЖ обектида жорий қилинган (2025-йил 25-апрелдаги 1-сон маълумотнома). Натижада йилнинг совуқ даврида иссиқ сув таъминоти эҳтиёжлари учун фойдаланиладиган ёқилғи-энергетика ресурсларининг қарийб 60 % тежалишига эришилган.