Эминов Афзал Ашраповичнинг
фан доктори (DSc) диссертацияси ҳимояси ҳақида эълон

I. Умумий маълумотлар. Диссертация мавзуси, ихтисослик шифри (илмий даража бериладиган тармоғи номи): «Техник мақсадлардаги алюмосиликат керамик материалларининг таркибларини ва паст ҳароратда олиш технологиясини ишлаб чиқиш», 02.00.13 – Ноорганик моддалар ва улар асосидаги материаллар технологияси, 02.00.15 – Силикат ва қийин эрийдиган нометалл материаллар технологияси (техника фанлари).
Диссертация мавзуси рўйхатга олинган рақам: B2025.3.DSc/T963.
Илмий маслаҳатчи: Сабиров Бахтиёр Тохтаевич, техника фанлари доктори, катта илмий ходим.
Диссертация бажарилган муассаса номи: Умумий ва ноорганик кимё институти.
ИК фаолият кўрсатаётган муассаса номи, ИК рақами: Умумий ва ноорганик кимё институти ҳузуридаги DSc.02/05.05.2023.K/T.35.02 рақамли илмий кенгаш асосидаги бир марталик илмий кенгаш.
Расмий оппонентлар: Верещагин Владимир Иванович, техника фанлари доктори, профессор; Мирзақулов Холтура Чориевич. техника фанлари доктори, профессор; Искандеров Ахмед Макседбаевич, техника фанлари доктори, профессор.
Етакчи ташкилот: Наманган давлат техника университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади: маҳаллий хомашё компонентлари асосида техник мақсадлардаги алюмосиликат керамик материалларининг таркибларини ва паст ҳароратда олиш технологиясини ишлаб чиқишдан  иборат.
III. Тадқиқотнинг илмий янгилиги: 
Альянс каолинини ҳўл усулда бойитиш орқали олинган АКФ-3 маркали каолин концентрати асосида техник керамика таркибларини ишлаб чиқиш имкониятлари асосланган;
юқори глиноземли массанинг импорт ўрнини босувчи таркибларини ишлаб чиқишда каолин, глинозем таркибли чиқиндилардан суюқланма ҳосил қилувчи қўшимчалар билан биргаликда фойдаланиш имкониятлари асосланган;
алюмосиликат намуналарида муллит ва корунд кристалл фазалари ҳосил бўлишига ғовак структурани ва нанодисперс алюминий оксидининг таъсир аниқланган; 
каолин ва бентонитлар билан биргаликдаги глинозем таркибли чиқинди миқдорининг алюмосиликат намуналарининг едирилишга ва майдалаш қобилиятига таъсири аниқланган;
юқори хароратда пишишдаги физик-кимёвий жараёнлар ойдинлаштирилган ва 1000-1400оС ҳарорат оралигида юқори глиноземли масса намуналарида муллит, корунд ва қисман кристобалит минералларининг кристалл фазалари ҳосил қилиш билан фазавий ўтишлари аниқланган; 
майдаловчи жисм, қоплама кошин ва керамик изолятор намуналарининг физик-кимёвий, технологик, эксплуатация ва диэлектрик хоссаларининг омухта компонент таркибига боғлик равишда ўзгариш қонуниятлари аниқланган;
муллиткорундли намуналардан изолятор учқун берувчи шамларида бутловчи элемент сифатида фойдаланиш имкониятлари аниқланган;
майдаловчи жисм, қоплама кошин ва керамик изоляторлар олиш учун пишишнинг технологик режимлари ва юқори глиноземли массанинг фракция таркиблари мақбуллаштирилган.
IV. Тадқиқот натижаларининг жорий қилиниши. Техник мақсадлардаги алюмосиликат керамик материаллар таркибларини ва паст ҳароратда олиш технологияларини ишлаб чиқиш бўйича олинган илмий натижалар асосида:
маҳаллий хомашё компонентлари асосида муллиткорундли майдаловчи жисмнинг ишлаб чиқилган  таркиби ва олиш технологияси “Бекабод-огнеупор” ҚКнинг “2026-2027 йилларда амалиётга жорий этиладиган истиқболли ишланмалар рўйхати”га киритилган (“Бекабод-огнеупор” ҚКнинг 2025 йил 23 июндаги 106-сонли маълумотномаси). Натижада, четдан келтирилганга нисбатан уч марта арзон майдаловчи жисм ишлаб чиқиш имконини беради;
маҳаллий хомашё компонентлари асосида юқори глиноземли массадан олинган муллиткорундли қоплама кошин таркиби ва олиш технологияси  “ART GLOSS GALLERY” ҚКнинг “2026-2027 йилларда амалиётга жорий этиладиган истиқболли ишланмалар рўйхати”га киритилган (“ART GLOSS GALLERY” ҚКнинг 2025 йил 10 июлдаги 10/11 2025-6-сонли маълумотномаси). Натижада, туйиш агрегатлари учун четдан келтирилганга нисбатан уч марта арзон қоплама кошин ишлаб чиқариш имконини беради;
маҳаллий хомашё компонентлари асосида учқун берувчи шамлар учун керамик изоляторларнинг ишлаб чиқилган таркиб ва олиш технологияси “AZIA PORSELAIN TRADE” МЧЖ ҚКнинг “2026-2027 йилларда амалиётга жорий этиладиган истиқболли ишланмалар рўйхати”га киритилган (“Ўзсаноатқурилишматериаллари” Уюшмасининг 2025 йил 24 июлдаги 02/15-2501 сон маълумотномаси). Натижада, паст ҳароратли технология асосида стандарт талабларга мос келган маҳсулот олиш имконини беради.