Амиров Элёр Мансуриддин ўғлининг
фалсафа доктори (PhD) диссертацияси ҳимояси ҳақида эълон
I. Умумий маълумотлар.
Диссертация мавзуси, ихтисослик шифри (илмий даража бериладиган тармоғи номи): «Қизилолмасой маъданли майдони Шимолий-Ғарбий участкасининг метасоматитлари: моддий таркиби, ҳосил бўлиш хусусиятлари ва маъдандорлиги», 04.00.03 – Геотектоника ва геодинамика. Петрология ва литология (геология-минералогия фанлари).
Диссертация мавзуси рўйхатга олинган рақам: В2023.3.PhD/GM195.
Илмий раҳбар: Карабаев Маматхан Садирович, геология-минералогия фанлари доктори, профессор.
Диссертация бажарилган муассаса номи: Геология ва геофизика институти.
ИК фаолият кўрсатаётган муассаса номи, ИК рақами: Геология ва геофизика институти, DSc.24/30.10.2020.GM.125.01.
Расмий оппонентлар: Мамарозиков Усмонжон Довронович, геология-минералогия фанлари доктори, катта илмий ходим; Каримова Феруза Бахтияровна, геология-минералогия фанлари бўйича фалсафа доктори (PhD), катта илмий ходим.
Етакчи ташкилот: Ўзбекистон миллий университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади: Қизилолмасой маъданли майдони Шимолий-Ғарбий участкасидаги метасоматик ўзгарган жинсларнинг петрографик хусусиятлари, моддий таркиби, тарқалиши ва маъданлашув билан боғлиқлигини аниқлашдан иборат.
III. Тадқиқотнинг илмий янгилиги:
Қизилолмасой маъданли майдони Шимолий-Ғарбий участкасидаги магматик тоғ жинслари бўйича ривожланган мусковит-кварц-дала шпатили, пропиллитли, карбонат-хлорит-слюдали метасоматик ўзгаришлар аниқланган;
илк бор майдондаги турли таркибли метасоматик ҳосилаларнинг таркибий хусусиятлари аниқланган ва улар билан олтин маъданлашувининг ўзаро генетик муносабатлари очиб берилган;
маъдан-метасоматик минералларининг кимёвий таркиби, учраш шакллари, типоморф белгилари ажратилган ҳамда олтин ва ҳамроҳ элементларнинг маъданларда тарқалиш хусусиятлари аниқланган;
метасоматитлар ва маъданларнинг геокимёвий хусусиятлари аниқланган ҳамда олинган барча маълумотлар асосида маъданлашувнинг қидирув-башоратлаш мажмуаси ишлаб чиқилган.
IV. Тадқиқот натижаларининг жорий қилиниши. Қизилолмасой маъданли майдони Шимолий-Ғарбий участкасидаги метасоматик ўзгарган жинсларнинг петрографик, минералогик-геокимёвий хусусиятлари бўйича олинган илмий натижалар асосида:
Шимолий-Ғарбий участкасидаги магматик ҳосилалар бўйича ривожланган метасоматитларнинг петрографик хусусиятлари “Ўзбек геология қидирув” АЖ Тошкент МГҚЕ амалиётига жорий қилинган (Ўзбекистон Республикаси Тоғ-кон саноати ва геология вазирлигининг 2024 йил 16 октябрдаги 08-3829-сонли маʼлумотномаси). Натижада, магматик тоғ жинслари бўйича ривожланган метасоматитларнинг олтин минераллашуви билан боғлиқ турларини аниқлашга имкон берган;
метасоматик ҳосилаларнинг моддий таркиби ва асосий минералларининг типоморф хусусиятлари ҳамда учраш шакллари “Ўзбек геология қидирув” АЖ Тошкент МГҚЕ нинг амалиётига жорий қилинган (Ўзбекистон Республикаси Тоғ-кон саноати ва геология вазирлигининг 2024 йил 16 октябрдаги 08-3829-сонли маʼлумотномаси). Натижада, метасоматик ҳосилаларда минераллар ва элементларнинг тарқалиш миқдорини тавсифлаш, майдондаги маъданлашув турларини аниқлаш имконини берган;
Метасоматитлар ва маъданларнинг минералогик-геокимёвий хусусиятлари “Ўзбек геология қидирув” АЖ Тошкент МГҚЕ амалиётига жорий қилинган (Ўзбекистон Республикаси Тоғ-кон саноати ва геология вазирлигининг 2024 йил 16 октябрдаги 08-3829-сонли маʼлумотномаси). Натижада, олтин маъданлашувини қидирув-башоратлаш мажмуаси ва майдоннинг чуқур горизонтларида келгусидаги ишларни давом эттиришга тавсиялар ишлаб чиқиш имконини берган.
