Чалабоев Шахобиддин Абдусаматовичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Бутасал, Нуклеопептид ва Миоста-Ҳ препаратларининг қоракўл қўйлар  организмига  қиёсий  таъсири”, 16.00.04 –Ветеринария фармакологияси ва токсикологияси. Ветеринария санитарияси, экологияси, зоогигиенаси ва ветеринар–санитария экспертизаси (ветеринария фанлари).
Диссертация мавзуси рўйхатга олинган рақам: B2024.3.PhD/В142 
Илмий раҳбар: Фармонов Низам, ветеринария фанлари номзоди, доцент.
Диссертация бажарилган муассаса номи: Самарқанд давлат ветеринария медицинаси, чорвачилик ва биотехнологиялар университети.
ИК фаолият кўрсатаётган муассаса номи, ИК рақами: Самарқанд давлат ветеринария медицинаси, чорвачилик ва биотехнологиялар университети, DSc.06/30.12.2019 В.12.01.
Расмий оппонентлар: Салимов Юнус, ветеринария фанлари доктори, профессор; Юлдашев Соатбой Жиянбаевич, тиббиёт фанлари номзоди, доцент.
Етакчи ташкилот: Ветеринария ва чорвачиликни ривожлантириш қўмитаси.
Диссертация йўналиши: назарий ва амалий аҳамиятга молик.
II. Тадқиқотнинг мақсади Бутасал, Нуклеопептид ва Миоста-Ҳ препаратларини қоракўл қўйлари организмига фармакологик таъсирини ўрганиш ҳамда улардан олинадиган гўштини ветеринария санитария жиҳатидан баҳолашдан иборат.
III. Тадқиқотнинг илмий янгилиги қуйидагилардан иборат:
Миоста-Ҳ препаратидан турли дозаларда (4, 8, 16, 24, 32, 40 мкл/бош) қўлланилганда оқ сичқонлар организмига заҳарли таъсир кўрсатмаслиги тажрибаларда исботланган.  
Биостимуляторларни бир-бири билан қиёслаганда, қоракўл қўзиларининг ўсиш ва ривожланишига ижобий таъсири этиши, жумладан ўртача тирик вазни Миоста-Ҳ препарати қўлланилган гуруҳда 23,75% га, Бутасал қўлланилганда 20,90% га ва Нуклеопептид қўлланилганда эса 21,85% га ошиши аниқланган;
Бутасал, Миоста-Ҳ, Нуклеопептид препаратларини қоракўл қўйлар  қонининг морфобиокимёвий (эритроцит, гемоглобин умумий оқсил, албумин, глобулин, глюкоза) кўрсаткичларига ижобий таъсир этиши тажрибаларда исботланди; 
Бутасал, Миоста-Ҳ, Нуклеопептид препаратлари қўлланилган қоракўл қўйларда гўштнинг сифати ветеринария-санитария жиҳатидан баҳолаганда унинг сифати ва озиқавийлик кўрсаткичларига  салбий таъсир этмаслиги илмий асосланган; 
Бутасал, Миоста-Ҳ, Нуклеопептид препаратларини қоракўлчилик соҳасида самарали қўллаш бўйича тавсиялар ишлаб чиқилган ва фермер хўжаликларига жорий этилган.
IV. Тадқиқот натижаларининг жорий қилиниши. Бутасал, Нуклеопептид ва Миоста-Ҳ препаратларининг қоракўл қўйлар организмига қиёсий таъсири” бўйича олинган илмий-тадқиқот натижалари асосида:
“Биостимуляторларнинг қоракўл қўйлар организмига фармакологик таъсири” номли тавсиянома тасдиқланган ва ветеринария амалиётига жорий этилган (Ветеринария ва чорвачиликни ривожлантириш қўмитасининг 2025 йил 3-январдаги 02/23-01-сон маълумотномаси). Ушбу тавсияларни қўллаш натижасида Бутасал, Нуклеопептид ва Миоста-Ҳ препаратларини қоракўл қўзилари организмига қиёсий таъсири аниқланган бунда «Миоста-Ҳ» препаратини қўллашнинг иқтисодий самарадорлиги 1 бош қўзи ҳисобига 2627310 сўмни, сарфланган 1 сўмга харажатлар қоплами 5,02 сўмни ташкил этган;
тадқиқотларда Бутасал, Нуклеопептид ва Миоста-Ҳ препаратларини қоракўл қўзилари организмига ижобий таъсир этувчи меъёр ва миқдорлари аниқланиб, олинган натижалар Самарқанд вилоятининг Нуробод туманидаги қоракўлчилик хўжаликларида жорий қилинган (Ветеринария ва чорвачиликни ривожлантириш қўмитасининг 2025 йил 3-январдаги 02/23-01-сон маълумотномаси). Натижада “Бутасал” препарати қўлланилган биринчи тажриба гуруҳи қоракўл қўзиларининг назорат гуруҳига нисбатан ўртача тирик вазни тажрибанинг 60-кунида 5,09 кг (20,90%) га, “Миоста-Ҳ” препарати қўлланилган иккинчи тажриба гуруҳи қоракўл қўзиларининг назорат гуруҳига нисбатан ўртача тирик вазни тажрибанинг 60-кунида 5,21 кг (23,75%) га, “Нуклеопептид” препарати қўлланилган учинчи тажриба гуруҳи қоракўл қўзиларининг назорат гуруҳига нисбатан ўртача тирик вазни тажрибанинг 60-кунида 5,13 кг (21,85%) га юқори бўлишига эришилган.