Алимов Оқилиддин Исамутдиновичнинг 
фалсафа доктори (PhD) диссертацияси ҳимояси ҳақида эълон 

I. Умумий маълумотлар
Диссертацияси мавзуси, ихтисослик шифри (илмий даража берадиган фан тармоғи номи): “Шарқий Осиё минтақаси энергетика хавфсизлигини таъминлашда Япониянинг ташқи сиёсий роли”, 23.00.04 – Халқаро муносабатлар, жаҳон ва минтақа тараққиётининг сиёсий муаммолари (сиёсий фанлар).
Диссертацияси мавзуси рўйхатга олинган рақам: B2018.3.PhD/Siyos109
Илмий раҳбар: Жўраев Сайфиддин Ахматович, сиёсий фанлар доктори, профессор.
Диссертация бажарилган муассаса номи: Тошкент давлат шарқшунослик университети.
ИК фаолият кўрсатаётган муассаса (муассасалар) номи, ИК рақами: Тошкент давлат шарқшунослик университети, Dsc.03/30.12.2019.Ss/Tar/21.02.
Расмий оппонентлар: Муҳаммадсиддиқов Муҳаммадолим Муҳаммадрозиқ ўғли сиёсий фанлар доктори, доцент; Умаров Хайрулла Пайзуллаевич сиёсий фанлар номзоди, доцент.
Етакчи ташкилот: Ўзбекистон Республикаси Президенти ҳузуридаги Давлат бошқаруви академияси.
Диссертация йўналиши: назарий ва амалий аҳамиятга молик.
II. Тадқиқотнинг мақсади: Шарқий Осиёда энергетика хавфсизлигини таъминлашга оид Япониянинг энергетика стратегияси ва кўп томонлама сиёсати хусусиятларини очиб беришдан иборат.
III. Тадқиқотнинг илмий янгилиги:
Шарқий Осиёда энергетика хавфсизлигини таъминлашнинг стратегик ҳамкорлик механизмларини минтақавий сиёсий интеграцион институтларни вужудга келтириш орқали шакллантириш зарурати асосланган; 
Шанхай Ҳамкорлик Ташкилоти, Осиё-Тинч океани минтақаси иқтисодий ҳамкорлиги, Шарқий Осиё Саммити, АСЕАН каби сиёсий ва иқтисодий ташкилотларнинг энергетика хавфсизлиги соҳасида минтақа давлатлари ташқи сиёсий стратегияларини мувофиқлаштириш имкониятлари очиб берилган;
Шарқий Осиё Энергетика Конференциясини таъсис этиш ва тузилмага Марказий Осиё мамлакатларини аъзо сифатида қабул қилиш таклифи асосланган; 
Япониянинг Шарқий Осиёда энергетика хавфсизлиги замонавий архитектураси шаклланишидаги етакчилик ва ташқи сиёсий регуляторлик вазифаси минтақада ягона энерготизимни вужудга келтириш имконияти сифатида далилланган.  
IV. Тадқиқот натижаларининг жорий қилиниши. Шарқий Осиё минтақаси энергетика хавфсизлигини таъминлашда Япониянинг ташқи сиёсий роли мавзуси бўйича олинган натижалар асосида:
Ўзбекистон ва Япония ўртасидаги икки томонлама муносабатларни ривожлантириш борасидаги илмий хулосаларидан Ўзбекистон Республикаси Президенти Администрациясининг Ўзбекистон Республикаси Президентининг Маслаҳатчиси-Спичрайтер бўлинмаси томонидан Ўзбекистон Республикаси Президентининг 2019 йил декабридаги Япония давлатига расмий ташрифи олдидан ахборот-таҳлилий материалларни тайёрлашда фойдаланилган (Ўзбекистон Республикаси Президентининг Маслаҳатчиси-Спичрайтер бўлинмасининг 2020 йил 12 июндаги далолатномаси). Мазкур илмий натижалар Ўзбекистон Республикаси ва Япония ўртасида икки томонлама энергетика ҳамкорлигини кучайтириш чора-тадбирларини кўришга, соҳага тегишли норматив-ҳуқуқий базани такомиллаштиришга хизмат қилган;
Япониянинг энергетика хавфсизлигини таъминлашдаги сиёсати ва стратегияси, ташқи сиёсий ташаббусларига оид хулосалардан Ўзбекистон Республикаси Ташқи ишлар вазирлигининг республика вазирлик ва идораларига юбориладиган ахборот-таҳлилий ҳужжатларини тайёрлашда фойдаланилган (Ўзбекистон Республикаси Ташқи ишлар вазирлигининг 2020 йил 28 майдаги №02/20533-сон маълумотномаси). Натижада Ўзбекистон Республикаси энергетика соҳасини модернизация қилиш, мазкур соҳада ислоҳотларни ўтказиш учун методологик асос бўлиб хизмат қилган; 
Ўзбекистоннинг Япония билан энергетика соҳасидаги ҳамкорлигини ривожлантиришга оид илмий натижалардан Ўзбекистон Республикаси Президенти ҳузуридаги Стратегик ва минтақалараро тадқиқотлар институтида бир қатор ахборот-таҳлилий материалларни ҳамда “Ўзбекистон ва Япония: ўзаро манфаатларга асосланган ҳамкорлик” номли таҳлилий материални тайёрлашда фойдаланилган (Ўзбекистон Республикаси Президенти ҳузуридаги Стратегик ва минтақалараро тадқиқотлар институтининг 2020 йил 6 августдаги 05-4/517 сон маълумотномаси). Мазкур илмий натижалар Ўзбекистон ва Япония стратегик ҳамкорлигининг савдо-иқтисодий, энергетика ва инвестициявий йўналишлари кўлами ва истиқболини аниқлашга хизмат қилади;
Япониянинг Шарқий Осиёда энергетика хавфсизлиги замонавий архитектураси шаклланишидаги етакчилик ва ташқи сиёсий регуляторлик вазифаси минтақада ягона энерготизимни вужудга келтириши юзасидан олинган илмий натижаларидан Ўзбекистон миллий телерадиокомпанияси айрим кўрсатувларининг сценарийларини тайёрлашда фойдаланилган, хусусан, «O‘zbekiston tarixi» телеканалида эфирга узатилган «Тақдимот» кўрсатувида диссертацияда илгари сурилган энг муҳим илмий-назарий ҳамда амалий фикрлар ёритилган (Ўзбекистон миллий телерадиокомпанияси “Ўзбекистон” телерадиоканали давлат унитар корхонасининг 2020 йил 13 февралдаги 02-10-358-сон маълумотномаси). Мазкур кўрсатувнинг эфирга узатилиши Япониянинг замонавий энергетика сиёсати мазмун-моҳияти, қайта тикланадиган энергия манбалари ва технологияларини ривожлантириш борасидаги тажрибаларини кенг жамоатчиликка етказилишига хизмат қилган.