Саидова Муҳайёхон Тулкиновнанинг 
фалсафа доктори (РhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Туксиз чигитни аниқ экадиган пневматик экиш аппаратини такомиллаштириш ва унинг параметрларини асослаш», 05.07.01 – Қишлоқ хўжалиги ва мелиорация машиналари. Қишлоқ хўжалиги ва мелиорация ишларини механизациялаш (техника фанлари). 
Диссертация мавзуси рўйхатга олинган рақам: В2021.4.PhD/Т1996.
Илмий раҳбар: Алимова Феруза Абдукадировна, техника фанлари номзоди, доцент.
Диссертация бажарилган муассаса (муассасалар) номи: Қишлоқ хўжалигини механизациялаш илмий-тадқиқот институти.
ИК фаолият кўрсатаётган муассаса номи, ИК рақами: Қишлоқ хўжалигини механизациялаш илмий-тадқиқот институти, DSc.05/13.05.2020.T.112.01 
Расмий оппонентлар: Имомқулов Қутбиддин Боқижонович, техника фанлари доктори, профессор; Мамажанов Султонали Исломалиевич техника фанлари номзоди, катта илмий ходим. 
Етакчи ташкилот: Қишлоқ хўжалиги техникаси ва технологияларини сертификатлаш ва синаш маркази.
Диссертация йўналиши: назарий ва амалий аҳамиятга молик.
II. Тадқиқотнинг мақсади Ўзбекистон тупроқ-иқлим шароитига мос туксиз чигитни уялаб аниқ экадиган пневматик экиш аппаратини такомиллаштириш ва унинг параметрларини асослаш орқали уруғлик, меҳнат сарфи ва бошқа харажатларни камайтиришдан иборат.
III. Тадқиқотнинг илмий янгилиги:
туксиз чигитни уялаб аниқ экадиган пневматик экиш аппаратининг конструктив схемаси ғуж аниқ уя ҳосил бўлишини ҳисобга олган ҳолда ишлаб чиқилган;
экиш диски сўрувчи уяларининг параметрлари уруғларнинг талаб даражасидаги сўрилиш ва уларни умумий массадан олиб чиқилишини таъминлаши лозимлигини ҳисобга олган ҳолда асосланган;
экиш аппаратининг ўрнатиш баландлиги уруғларнинг экиш дискидан ажралгандан сўнг учиш масофасини ҳисобга олган ҳолда аниқланган;
туксиз чигитни уялаб аниқ экадиган пневматик экиш аппарати экиш дискининг мақбул параметрлари унинг агротехник ва энергетик иш кўрсаткичларини ифодаловчи регрессия тенгламаларини биргаликда ечиш орқали аниқланган.
IV. Тадқиқот натижаларининг жорий қилиниши. Туксиз чигитни аниқ экадиган пневматик экиш аппаратини такомиллаштириш ва унинг параметрларини асослаш бўйича олинган илмий натижалар асосида:
туксиз чигитни уялаб аниқ экадиган пневматик экиш аппаратининг конструкциясини лойиҳалаш ва ишлаб чиқариш учун техник топшириқ ишлаб чиқилган (Қишлоқ хўжалиги вазирлигининг 2020 йил 23 декабрдаги 02/023-4559-сон маълумотномаси). Натижада туксиз чигитни уялаб аниқ экадиган такомиллаштирилган пневматик экиш аппаратининг конструкциясини ишлаб чиқиш имкони яратилган;
янги ишлаб чиқилган экиш диски билан жиҳозланган пневматик сеялканинг тажриба нусхаси Янгийўл туманидаги “Қовунчи Валижон Агро Файз” ва “Шамшодбек-Равшанбек” фермер хўжаликларида жорий этилган (Қишлоқ хўжалиги вазирлигининг 2021 йил 09 сентябрдаги 02/023-3677-сон маълумотномаси). Жорий қилиниш натижасида чигит уруғларини уялаб экадиган пневматик экиш аппарати билан жихозланган сеялкани қўллашда мавжуд сеялкаларга нисбатан уруғлик сарфини 1,1-1,4 мартагача ва бошқа ҳаражатларни 1,1-1,3 мартагача камайиши ва иш унумини 1,2 мартагача ошиши таъминланган.
пневматик сеялканинг экиш аппаратини ишлаб чиқаришни ўзлаштириш учун лойиҳа-конструкторлик ҳужжатлари (техник топшириқ ва чизмалар) «BMKB-Agromash» АЖ да лойиҳалаш жараёнига жорий этилган (Қишлоқ хўжалиги вазирлигининг 2021 йил 09 сентябрдаги 02/023-3677-сон маълумотномаси). Натижада туксиз чигитни уялаб аниқ экадиган такомиллаштирилган пневматик экиш аппаратининг саноат нусхасини ишлаб чиқариш имкони яратилган.