Нуритдинов Нуриддин Анварходжаевичнинг
фан доктори (DSc) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Сурункали юрак етишмовчилигида чап қоринча диастолик дисфункциясининг клиник-нейрогуморал ва генетик аспектлари» 14.00.06 – Кардиология (тиббиёт фанлари).
Диссертация мавзуси рўйхатга олинган рақам: B2020.2. DSc/Tib416.
Илмий маслаҳатчи: Камилова Умида Кабировна, тиббиёт фанлари доктори, профессор.
Диссертация бажарилган муассаса номи: Тошкент тиббиёт академияси. 
ИК фаолият кўрсатаётган муассаса (муассасалар) номи, ИК рақами: Республика ихтисослаштирилган кардиология илмий–амалий тиббиёт маркази, DSc.04/30.12.2019.Tib.64.01.
Расмий оппонентлар: Васюк Юрий Александрович, тиббиёт фанлари доктори, профессор; Гадаев Абдигаффор Гадоевич, тиббиёт фанлари доктори, профессор, Абдуллаева Гузаль Жалолиддиновна, тиббиёт фанлари доктори. 
Етакчи ташкилот: Белоруссия Республика кардиология илмий-амалий маркази (Беларус Республикаси).
Диссертация йўналиши: амалий аҳамиятга молик.
II. Тадқиқоднинг мақсади: клиник-нейрогумолрал ва генетик предикторларни ҳисобга олган ҳолда сурункали юрак етишмовчилигини эрта ташхислаш ва ривожланишини прогнозлаш ҳамда даволаш услубларини такомиллаштириш бўйича таклиф ва тавсиялар ишлаб чиқишдан иборат
III. Тадқиқотнинг илмий янгилиги:
илк бор ўзбек миллатига мансуб СЮЕли беморларда альдостеронсинтаза С(-344)Т CYP11B2 ва мия натрийуретик пептиди T(-381)C NPPB генлари полиморфизмининг тарқалиш ва касаллик шаклланишида иштирок даражаси аниқланган;
сурункали юрак етишмовчилиги бор беморларда нейрогуморал омилларни юрак диастолик дисфункцияси турига боғлиқ ҳолда яққол ошиши ва уни касалликнинг оғирлик даражаси билан ҳамоҳанглиги аниқланиб, касалликни кечиши ва ноҳуш прогнозни хамда даволаш самарадорлигини баҳолашдаги башоратлаш аҳамияти асосланган;
илк бор ўзбек миллатига мансуб СЮЕли беморларда С(-344)Т CYP11B2 ва мия натрийуретик пептиди T(-381)C NPPB генларининг беморларда касаллик ривожланишининг молекуляр-генетик детерминантлари аниқланган ҳамда улар билан касаллик клиник кечиши ҳамда юрак диастолик функцияси бузилишлари орасида ассоциация мавжудлиги исботланган;
сурункали юрак етишмовчилигида касаллик кечиши оғирлик даражаси, чап қоринча рестриктив диастолик дисфункцияси ва буйрак дисфункцияси ривожланиш хавфини аниқловчи клиник-нейрогуморал, визуализацион ва генетик предикторлар аниқланган;
сурункали юрак етишмовчилигида юрак диастолик дисфункцияси ривожланиши ва касаллик клиник кечиши жараёнларини ташхислаш, даволаш алгоритмлари ва касалликни башоратловчи модель ишлаб чиқилган ҳамда патогенетик даволаш тартиби нейрогуморал ва генетик текширувлар асосида такомиллаштирилган.
IV. Тадқиқот натижаларининг жорий қилиниши. 
Сурункали юрак етишмовчилиги билан касалланган беморларда юрак диастолик функцияси ўзгаришларининг клиник-диагностик асослари ва уларни даволаш бўйича олинган илмий натижалар асосида:
сурункали юрак етишмовчилиги бўлган беморларда юрак ва буйрак функцияси ўзгаришларини ташхислаш бўйича тадқиқотнинг натижалари асосида ишлаб чиқилган «Сурункали юрак етишмовчилигида буйрак дисфункциясини эрта ташхислаш» услубий тавсиянома тасдиқланган (Соғлиқни сақлаш вазирлигининг 2020 йил 22 июндаги 8н-р/179-сон маълумотномаси). Мазкур услубий тавсиянома сурункали юрак етишмовчилиги бор беморларда буйрак функцияси ўзгаришларини ташхислашни самарали амалга ошириш имконини берган;
сурункали юрак етишмовчилиги бўлган беморларда юрак диастолик функциясини эрта аниқлаш бўйича илмий тадқиқотнинг натижалари асосида ишлаб чиқилган «Сурункали юрак етишмовчилиги бўлган беморларда юрак диастолик функциясини эрта ташхислаш усули» мавзусида услубий тавсияномаси тасдиқланган (Соғлиқни сақлаш вазирлигининг 2020 йил 12 декабрдаги 8н-д/265-сон маълумотномаси). Мазкур дастур юрак диастолик дисфункциясини ўзгаришларини ташхислаш алгоритмини самарали амалга ошириш имконини берган;
сурункали юрак етишмовчилиги бўлган беморларда юрак диастолик функцияси ўзгаришларини клиник-диагностик асослари ва уларни даволашни такомиллаштиришга қаратилган тадқиқот натижалари соғлиқни сақлаш амалиётига, жумладан, Республика ихтисослаштирилган терапия ва тиббий реабилитация илмий-амалий маркази, 1- сон Республика клиник шифохонаси, Бухоро вилояти кўп тармоқли тиббиёт маркази, Бухоро кардиологик диспансери, Тошкент вилояти ихтисослаштирилган соматик шифохонаси, Юнусобод тумани марказий кўп тармоқли поликлиникаси амалиётига тадбиқ этилган (Соғлиқни сақлаш вазирлигининг 2021 йил 15 сентябрдаги 08-09/12062-сон маълумотномаси). Олинган натижалар сурункали юрак етишмовчилигини эрта ташхислаш, касаллик клиник кечишини прогнозлаш, асоратларини олдини олишга имконини берган.