Адилова Дурдона Шухратовнанинг 
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «SARS-CoV2 инфекциясининг эрта реабилитация даврида жигар шикастланиши», 14.00.05 – Ички касалликлар (тиббиёт фанлари).
Диссертация мавзуси рўйхатга олинган рақам: В2022.2.PhD/Tib2668.
Илмий раҳбар: Даминова Лола Тургунпулатовна, тиббиёт фанлари доктори, профессор.
Диссертация бажарилган муассаса номи: Тошкент педиатрия тиббиёт институти.
ИК фаолият кўрсатаётган муассаса (муассасалар) номи, ИК рақами: Тошкент тиббиёт академияси, DSc.04/30.12.2019.Tib 30.02.
Расмий оппонентлар: Каримов Мирвосит Мирвасикович, тиббиёт фанлари доктори, профессор; Рустамова Мамлакат Тулабаевна, тиббиёт фанлари доктори, профессор.
Етакчи ташкилот: Тиббиёт ҳодимларининг касбий малакасини ривожлантириш маркази.
Диссертация йўналиши: амалий аҳамиятга молик.
II. Тадқиқотнинг мақсади COVID-19 ўтказган беморларнинг эрта реабилитация даврида жигарнинг функционал ҳамда структуравий ҳолатини баҳолаш ва аниқланган ўзгаришларни даволашни мувофиқлаштириш йўлларини аниқлашдан иборат. 
III. Тадқиқотнинг илмий янгилиги:
COVID-19 нинг эрта реабилитация давридаги беморларда цитолитик, холестатик синдром мавжудлиги ва оқсил синтез қилиш фаолиятининг пасайиши билан кечувчи жигарнинг функционал ҳолатини бузилишининг биокимёвий белгилари асосланган;
жигар биокимёвий кўрсаткичларининг яққол ифодаланганлигининг мезенхимал-яллиғланиш ва гиперкоагуляция синдромлар фаоллиги билан боғлиқлиги исботланган;
COVID-19 билан касалланган беморларда жигар фиброзининг ривожланиш хавфини башорат қилувчи омиллар сифатида анамнезида аутоиммун гепатит, қон зардобида лактатдегидрогеназа  концентрациясининг ортиши ва эластографияда жигар паренхимасининг қаттиқлик даражаси каби кўрсаткичлар асосланган;
гепатопротекторлардан фойдаланиш касаллик реабилитациясида цитолитик, холестатик синдромлар ва портал гипертензия белгилари меъёрлашувига ижобий таъсир этиши асосланган. 
IV. Тадқиқот натижаларининг жорий қилиниши. 
Эрта реабилитация даврида COVID-19 ўтказган беморларда жигарнинг функционал ва структуравий ҳолатини баҳолаш ҳамда даволаш йўлларини аниқлаш бўйича олинган илмий натижалар асосида ишлаб чиқилган: 
SARS-CoV2 инфекциясининг эрта реабилитация даврида жигар шикастланиши бўйича олинган натижалар асосида ишлаб чиқилган “COVID-19нинг эрта реабилитация даврида жигар шикастланиши билан оғриган беморларни бошқариш алгоритми” услубий тавсияномаси тасдиқланган (Соғлиқни сақлаш вазирлигининг 2022 йил 6 июндаги 8н-р/577-сон маълумотномаси). Мазкур услубий тавсиянома COVID-19 билан касаллангандан кейинги реабилитация чоралари тамойилларини такомиллаштириш ва жигар фиброзининг ривожланиш хавфи юқори бўлган беморларни ажратиш, асоратлар хавфини камайтириш, касалликнинг прогнозини ҳамда беморларнинг яшовчанлигини яхшилаш имконини берган;
COVID-19 ўтказган беморлар жигарнинг функционал ва структуравий ҳолатини баҳолаш ҳамда даволашни мувофиқлаштириш бўйича олинган илмий натижалар соғлиқни сақлаш амалиётига, жумладан, Тошкент тиббиёт академияси кўп тармоқли клиникаси ва Самарқанд вилоят кўп тармоқли тиббиёт марказининг тиббий реабилитация бўлими амалиётига жорий қилинган (Соғлиқни сақлаш вазирлигининг 2023 йил 13 январдаги 08/00427-сон маълумотномаси). Олинган илмий натижаларнинг амалиётга татбиқ этилиши эрта реабилитация даврида COVID-19 билан касалланган беморларда гепатобилиар тизим дисфункциясини ўз вақтида ташхислаш ва жигар фибрози ривожланиши хавф омилларини аниқлаш, даволашни такомиллаштириш ҳамда ва прогнозни яхшилаш имконини берган.