Нишонова Шахнозахон Тохиржон қизининг
фалсафа доктори (PhD) диссертацияси ҳимояси ҳақида эълон

I. Умумий маълумотлар: 
Диссертация мавзуси, ихтисослик шифри (илмий даража бериладиган фан тармоғи номи): “Сингуляр коэффициентли эллиптико – гиперболик ва эллиптико – параболик типдаги тенгламалар учун нолокал масалалар”, 01.01.02 – Дифференциал тенгламалар ва математик физика (физика-математика фанлари).
Диссертация мавзуси рўйхатга олинган рақам: В2018.2.PhD/FM220.
Илмий раҳбар: Уринов Ахмаджон Кушакович, физика-математика фанлари доктори, профессор.
Диссертация бажарилган муассаса номи: Фарғона давлат университети.
ИК фаолият кўрсатаётган муассаса номи, ИК рақами: Фарғона давлат университети, PhD.03/30.12.2019.FM.05.04.
Расмий оппонентлар: Мирсабуров Мирахмат, физика-математика фанлари доктори, профессор; Апаков Юсупжон Пулатович, физика-математика фанлари доктори, доцент.
Етакчи ташкилот: Ўзбекистон Миллий университети.
Диссертация йўналиши: назарий аҳамиятга молик.
II. Тадқиқотнинг мақсади сингуляр коэффициентли эллиптико – гиперболик ва эллиптико – параболик типдаги дифференциал тенгламалар учун нолокал масалалар қўйиш ва ўрганишдан иборат.
III. Тадқиқотнинг илмий янгилиги: 
аралаш соҳаларда қўйилган нолокал чегаравий масалалар ечимининг ягоналиги ва мавжудлиги исботланган;
чорак доирада иккита сингуляр коэффициентли эллиптик типдаги тенглама учун соҳа чегарасида изланаётган функция ва унинг каср тартибли ҳосиласини боғловчи нолокал шартли турли масалаларнинг бир қийматли ечилиши исботланган.
ярим доирада битта сингуляр коэффициентли эллиптик типдаги тенглама учун интеграл шартли бир нолокал чегаравий масала ечимининг ягоналиги ва мавжудлиги исботланган;
эллиптик ва эллиптико – гиперболик типдаги тенгламаларга қўйилган нолокал чегаравий масалаларга мос нолокал спектрал масалаларнинг хос қийматлари ва хос функциялари топилган.
IV. Тадқиқот натижаларининг жорий қилиниши. 
Сингуляр коэффициентли эллиптико – гиперболик ва эллиптико – параболик типдаги дифференциал тенгламалар учун нолокал масалалар бўйича олинган натижалар асосида:
сингуляр коэффициентли эллиптико – гиперболик ва эллиптико – параболик типдаги тенгламалар учун нолокал масалалар тадқиқоти натижалари 1.7311.2017/8.9 рақамли “Дифференциал ва псевдодифференциал тенгламалар учун чегаравий масалалар тадқиқот усулларини ривожлантириш” халқаро лойиҳасида фойдаланилган (Белгород давлат миллий тадқиқот университетининг 2020 йил 5 мартдаги У-88-сон маълумотномаси). Олинган натижалар дифференциал тенгламалар ечимлари кўринишидан фойдаланиш ва уларни амалий масалаларга қўллаш имконини берган;
каср тартибли ҳосила ва интеграллар қўлланилган эллиптико – гиперболик типдаги тенгламалар учун нолокал шартли чегаравий ва спектрал масалалар, ҳамда эллиптико – параболик типдаги тенгламалар учун интеграл шартли масалалар тадқиқоти натижалари Математика ва компьютер моделлаштириш лабораторияси доирасида сингуляр коэффициентли хусусий ҳосилали дифференциал тенгламалар учун чегаравий масалалар ечимининг мавжудлиги ва ягоналигини исботлашда қўлланилган (Витус Беринг номидаги Камчатка давлат университетининг 2020 йил 26 февралдаги 111-03-сон маълумотномаси). Олинган натижаларни қўллаш каср тартибли дифференциал тенгламалар учун чегаравий масалалар ечимини қуриш имконини берган.